Слава печальная
Российскому народу смерти Петра Великаго императора и самодержца всероссийскаго
плачевную весть внесшая, ныне оная неблагополучная весть плачевною трагедиею изображена плачевно
на феатре публичном в московской Гошпитале чрез хирургической науки учеников, 1725 году декабря в
26 день
ACTUS 1-MUS
Изходят богини смертныя, сигнал свой носяще, им же отвещается тако:
Слава мира сего проходит.
Юноша яко пузырь,
Флора яко цвет,
Инная яко свеща,
Инная яко глас мимо ходит.
Смерть
Тако слава преходит мира сего.
PROLOGUS
Печаль
Двойственная мысль, сугубое дело, не единая вещь в торжественном сем Христа рождшагося
празднике российскому христианскому народу предлежит, на сей трагедической феатр собравшися,
благородни, всяк своего достоинства титлою почтенны, слышатели: како бо может соравнитися печаль с
радостию, веселие с воздыханием, свобода с пленностию, отчаяние с надеждою, сугубое таковое дело
противные суть вещи, яко в сем уже настоящем торжестве явися ни единая вещь, ибо радуемся ныне о
сошествии Сына Божия в плачевную удоль мира сего, им же свободихомся от работы греховной, им же
искуплени быхом от плена дияволя, печалимся, вздыхаем и стенем горце, охаем на долг час, яко
плененны есмы печалию общею, глаголю, ибо всемирною, всероссийскою, едва, едва оплакатися
могущею, сугубое дело днесь бывает, рождение бо небеснаго царя царей Христа Господа празднуется,
смерть же царя земнаго императора и государя всероссийскаго, ах, увы, увы, Петра Алексеевича,
вспоминаема бывает. О таком-то деле, деле плачевном, двойственную мысль имуще, не в пированиях,
плясаниях, пиянствах и безчинствах дни сия провождати есмы должны, благороднии сынове российстии,
воспоминающе печаль общую, горесть бедную, жалость лютую, не у заглаженную, ниже бо рочное
время блаженныя его кончины мину. Воспомяни убо, роде российский, отца своего, милостиваго
защитника императора и государя, воспомяни вся его, яже к тебе показанная благодеяния, воспомяни
Петра твоего и сего Перваго, и сего Великаго, воспомяни храбраго подвижника, мужественнаго
ковалера. Ах, увы, нет нашего государя, преиде свет очию нашею, угасе свеща всероссийская -дражайший
наш Петр, Петр Алексеевич, Петр камень веры, ей, камень бысть, защитник бо и отец
отечества. Оплачьте убо, россиская чада, милостиваго отца вашего, оплачьте, вой всероссийские,
храбраго вашего ковалера, оплачьте, старии, непоколебимаго жезла старости вашей, оплачьте, юный,
премудраго вашего учителя, оплачи напоследок, самое отечество, Россие, глаголю, дражайшее свое чадо
воспитавшая, и виждь, кто и какову остави тя. А понеже и мы суще российстии сынове и его государя
вернии поддании, последнюю верность и услугу ему днесь являюще плачевную, ей, плачевную сию
трагедию, не комедию о россиской печали, смертию его императорского величества приключившейся на
сем феатре предложити умыслихом, не игра бо зде днесь быти имеет, слышателие, но нечто страшно,
плачевно и ужасно сие действие. Аще помыслите, что изъявляется, и о ком то бывает, вас того ради
просим, яко благоразумных и благородных, да в тихости и внимании слушающе сего действия будете, и
с печалию российскою восплачете, утрее же возрадуетеся, егда другое действие о вступлении
царствования всероссийской матери ея императорского величества всепресветлейшия государыни
императрицы Екатерины Алексеевны узрите. Ныне аще погрешити случилось бы, яко младому еще
разуму, прощение мирное даруйте.
SCAENA 1-МА
Стр.1